【龔成專欄】退休女買ELI被迫高位接阿里慘輸300萬應拒絕槓桿求穩健宜減持科技股

By 龔成 on 11 Jul 2022

專欄作家

財經書籍作者及股評人 https://www.facebook.com/80shing -《80後百萬富翁》、《財務自由行》、《50優質潛力股》、《股票勝經》等，十多本財經書作者 -於網上分享投資心得，瀏覽量過百萬，為人氣博客，解答理財問題20000條 -讀中學時已開始投資股票，逾20年投資經驗 -運用巴菲特的價值投資法買股，視買股票如買生意一樣 -過往10年的投資成績，逾過半數能獲利超過1倍以上 -淨流動資產逾數千萬 -成功獲取基本財務自由

人難免有貪念，有已退休的女股民疑不甘收息股升幅少，過去兩年買入大量科技股及ELI股票結構性產品後，遇大跌市被迫接貨，結果單是手上的阿里巴巴（9988）便賬面蝕了一半，損失300萬，最慘的每次止蝕沽貨後總是遇大反彈，致「左一巴、右一巴」。投資書籍作者及股評人龔成認為女事主投資心態不妥，頗為危險，因已退休人士投資重點應該是保本減風險，故不應大量買入高風險科技股，亦應避開股票結構產品或有槓桿成分的保單融資。龔成建議女事主先學好基本財務知識，再於限制風險的情況下投資，以策安全。

Photo from BusinessFocus

【Q26834：投資阿里巴巴蝕300萬點算好？】

龔Sir，你好。我記得年半之前問過你。你建議我買收息股，但係我買完一輪，覺得好悶又見賺到少少錢，所以我就轉去買啲科技股。可惜而家科技股賬面冇左一半，仲要係我買了差不多一層樓嘅錢。原因有啲係幫銀行買嘅ELI（股票掛鈎票據）接嘅貨！

現時我持有：9988、1810、0175、2628、1177、880、1928、270及83。除了9988唔見一半帳面，其他大約賬面係蝕10～20%。

其實我同我先生已經退休,我今年51歲,先生57歲，咁其實呢一千萬股票是我4分1身家。因為我比較鍾意買融資儲蓄保險，所以我將一半放在保險，另外就只有一層自住物業。仲有大半年後保險到期，會有1000萬攞返嚟，咁你覺得我啲股票係咪應該睇長線，唔好理佢股價較好？還是睇機會放一半科技股，唔好咁重注呢？謝謝你解答。

其實我同你背景好似㗎，我都係公屋出生，一路都係打工儲錢好慳咁買樓，買完一間又一間。反而股票玩親我都輸，冇諗過今次輸咁多，淨係隻9988已經唔見咗我三百幾萬，其實我都覺得有時想認命，點解玩親股票永遠都係賺粒糖，輸間廠！

近期個股市我忍住唔放，佢就同我上上落落，見財化水。但係我一放佢就一飛沖天！之前我聽你講688唔好揸咁多貨，我本身有12萬股。。。蝕少少我都走！冇諗過一走佢就係咁上，到最後其實我只係賺咗佢利息！唉！真係覺得自己玩股票弱過玩樓好多。

Photo from BusinessFocus

龔成老師︰

坦白講，你現時要做的第一件事，就係處理好你「投資心態」，否則我教你再多嘢，都係無用。因為投資係為左有效地提升財富，而唔係為咗樂趣。

理財其實是一個配置的過程，係會因應自已的財政狀況、風險承受能力、年齡、負擔、要求回報等，從而確認那一類資產較適合自已。理財觀念中的「配置」，是十分重要。因為你已經退休，無左正規收入，所以要好小心，錯左好難追返轉頭。

而且，你現時人生階段最需要，是一個穏定被動收入，支援退休生活。因此，我才會建議你集中收息股。除非你已經有足夠被動收入，否則資金不要用來買波動性高架股票。但你選擇投資科技股，科技股屬於潛力類別，而且不確定性高，波幅通常好大，以你的年紀就算想投資，都唔應該大注。

第二，你投資的時候無「分注」，就算是高階的投資者都會分注，因爲無人有水晶球，能夠準確預測大市，但分注有助將成本平均。而且融資儲蓄保險、股票結構性產品（ELI）這類風險高的投資工具建議你不要使用。

你現時的組合中，小米（1810）、吉利（0175）、中生（1177）、阿里（9988）屬於潛力股，但阿里因爲監管等因素，中短期會較弱，不適宜持有太多，一般只建議持有最多佔組合的10%。潛力股整體的波動性會較大，你已經是已退休人士，因此，長遠最多只可維持1-2成，避免組合風險過高。

澳博控股（0880），金沙（1928）雖然續牌件事係明朗化左，但博彩業依然存在不確定因素，因此都唔好太過進取，要保守少少，控制整體注碼。不能佔組合過多，建議維持5-10%。信和置業（0083），粵海投資（0270）持有可以。中國人壽（2628）質素一般，不宜持有太多。

你的投資心態和知識都有待改善，記住投資不是炒賣，而是在合理風險下，要賺一個最大的回報。「一買就跌，一賣就升」有機會係你對估值和分析不了解，當然就算分析好都有機會，出現0688咁架情況，因為中短期有好多嘢都估唔到。

但只要你用架方法正確，大部份投資都應該會在正常運動，佢地的回報，足以抵消小部份不確定性所造成的損失。因此，我地進行投資之前一定要先為企業估值，並同時了解企業的前景以及賺錢能力等，你的種種陳述顯示你對股票投資還是一知半解。

另外，Premium Financing（保單融資），其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。若保單實際回報，係多於貸款利息，投保人自然會因為槓桿操作，而令回報放大左。但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。建議你最好係用一些較傳統儲蓄保單，而非這類有槓桿性質的產品。投資工具其實只是創富的工具，關鍵是你如何運用。建議先增加財務知識，再去投資。你可以睇我寫的《80後千萬富翁》、《財務自由行》和《股票勝經》，都適合初學者。如果你睇唔明D書或者唔鐘意睇書，我強烈建議你去上我股票初班，否則長線再係咁做投資，係極度危險。