【戴耀豪專欄】減買債加速 加息日子快殺到「明知收水 但都想炒多陣吖嘛！」

係！大家都明知美國終有一日會收水，但一日未收都想炒多陣嘛！事實上，美國都未正式宣布要收水，仍然都係維持利率不變，只不過做緊加息前一步，下個月會再加快縮減買債步伐，仲加快一倍到300億美元，預計出年3月就會結束買債。買債步伐都可以話變就變，照道理加息日子都可能話嚟就嚟囉！

而且連英國都意外加息0.15個百分點，至0.25厘。睇返英國央行都係話，因為近期CPI去到歷史高位，出年物價會進一步提升，好大程度上係因為薪酬同能源提升。雖然英央行話出年下半年CPI好可能回落，不過CPI回落都講咗一段時間，但依然高企，而今次加息都令大家有啲意外，都唔排除頂唔順CPI咁高，會再加息去撳低通脹。鄰國開咗先例，美國嘅CPI都爆哂燈，隨時跟住加息嘅機會都唔細。

Photo from BusinessFocus

不過市場方面都係驚一驚，上日(16日)見到大市一度跌至23287點，但可能大家聽加息已經聽到冇咩感覺，最後都微升到54點，最終守得住23400點水平，收報23475點，叫做見得返支陽燭仔。不過睇圖表都見到，大市仍然呈現下跌趨勢，十天線仍未收復，暫時大市都會偏弱。建議好倉要先行避一避，盡量都唔好揸重貨啦，始終見到成交量都係唔太配合得到，雖然今日回升返去到1381億元，但同月初1700億元水平比都仲有段距離，成交量暫時都會係大市嘅絆腳石。

10天線：23510點(已跌穿)
20天線：23501點(已跌穿)
50天線：23485點(已跌穿)

圖表方面，見到14天RSI落到去37.684，見到大市勢頭依然比較，不過見到今日大市喺23100點可以頂得住，就睇下之後大市會唔會有一個比較明顯嘅反彈啦！

Photo from BusinessFocus

【#PerryTai推介】
焦點板塊：
核電股—大市不停隊落嚟之下，見到核電股走勢都唔錯，可以逆市向上，相信整固完仲有機會再上，大家可以留意一下綠色能源、

焦點股份：
中廣核新能源(01811)—國策推動之下，公司收入同淨利都有明顯增長，今年中期收入7.97億美元，按年增長到34.3%，其實見到集團自己都頗有實力，早前公布今年頭11個月發電量表年增加到32.9%，其中內地風電項目發電量增加到73.9%，其實都可以睇到雙碳政策對中廣核新能源嘅幫助幾大，相關項目可以大大推升，相信嚟緊都會繼續呢個情況。上日見到呢隻股都升到半成有多，升勢唔錯。見到之前大概喺7.8元左右碌落嚟，如果突破到呢個位，有望挑戰前頂8.99元，現價7.6元附近都值得留意一下

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。