【戴耀豪專欄】世茂急急科水 嚇到內房物管股跳哂樓「無人肯揼水畀呢個集團」

呢排個市咁，都明白大家好心急，不過之前都有同大家講過，要個市守得住23800點，同埋成交額回升，先可以確認恒指結束跌勢，結果驚風散都嚟唔切食，個市又冧返落去。前日恒指收報23635點，跌318點，成交金額1199億元。雖然我仍然唔會放棄「#牛軍最後一個大好友」嘅身份，但短線我都會睇淡大市，始終十天線守唔住，成交額由月初1700億元左右，落到近期只有1100億、1200億元附近。如果成交額繼續呢啲水平，大市都會欠缺動力上返去，再碌返落前底23100點水平都真係唔出奇。

10天線：23838點(已穿)
20天線：24242點
50天線：24838點

圖表方面，見到14天RSI跌穿返40，落到去38.14，都好明顯見到大市冇上個禮拜勢頭咁好，所以大家暫時都係宜守不宜攻。

雖然，A股方面表現唔錯，不過見到近日港股方面負面消息接踵而來，先有商湯（20）要延遲上市，呢幾日內房又繼續「債務纏身」，投資者都好難對大市有信心，又點會有資金肯入市呢？所以A股點好應該都冇咩作用，大家都係忍下手先，睇定啲先諗入貨啦！

Photo from BusinessFocus

Photo from BusinessFocus

再講講昨日跌到好似跳樓咁嘅內房同物管股，其實相關板塊禮拜一已經開始見到沽壓，講返就係因為見到世茂服務（873）急急科水，嚇到內房物管股跳哂樓。其實科水某啲時候嚟講都好平常，有時真係有發展項目要揼水、目標做收購併購都可以科水，但點解今次世茂科完水點解今次咁得人驚呢？

留意返，今次世茂收購嘅係同系物管項目︰

「於2021年12月13日，本公司（世茂服務）與上海世茂訂立該協議，據此，本公司有條件同意收購 而上海世茂有條件同意出售目標業務，代價為人民幣 1,653.5百萬元。目標業務是上海世茂在中國從事的物業管理服務業務及相關增值服務。」

收購同系，即係市場上無人願意揼水畀呢個集團，旗下物管股即時變成集團嘅「提款機」，市場亦擔心同業有樣學樣，所以其他物管股有理冇理沽定先。

而且世茂已經多次傳出債務違約消息，大家對集團可以解決債務問題完全冇信心，市場唔驚就假。其實早一日已經見到世茂股債雙跌，上日世茂系股都係繼續跳哂樓，好似世茂集團（813）收跌19.9%，報5.67元，世茂服務直頭跌32.02%，報4.84元，大家千祈唔好撈底，相信唔使我講，大家都知肯定未跌定，都冇入貨嘅理由啦。

【#PerryTai推介】
焦點板塊：
無

焦點股份：
無 ─ 我份人好坦白，有就有，冇就冇，唔會呢頭先叫大家睇定啲，嗰頭水大家入貨，大家一齊忍手，儲吓子彈，等入我嘅推介。

利益申報：
本人沒有持有上述文章提及的股票

戴耀豪
結好證券客戶投資組副總裁

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。