【戴耀豪專欄】11月波幅窄成交弱 後市不樂觀 騰訊頂住負面消息「好似已見到個底」

暫時睇到大市的上升動力都唔係太足夠，雖然昨日（25日）都可以微升54點，去到24740點位置，但見到成交依然都比較薄弱，得1000億多啲，如果成交量維持喺低水平，大市要升得起就真係比較困難啦！

Photo from BusinessFocus

喺圖表上都睇到，大市依然畀幾條主要平均線（十天、二十天、五十天平均線）壓住哂，呢個形勢睇，暫時大市真係不容樂觀啦！我諗至少都要修復返50天線（25061點）先有情講再升返上去啦。

10天線：25148點
20天線：25102點
50天線：25061點

另一點就見到，其實今個月嘅波幅都係比較窄，由月頭的24400點水平，去到最多升到25746點，大概只有1200、1300點波幅，平均嚟講波幅都係比較窄少少，咁就要睇下，喺結算日前夕，個勢係咪都要咁落去，因為下個星期一就已經係結算日，昨日都已經係期指轉倉嘅高峰期。

再同大家講講個股方面，整體嚟講一啲傳統舊經濟股唔係好識升咁，例如友邦（1299）就停滯不前，藍籌嚟講都包尾咁滯，反觀返新經濟股表現就真係好啲，例如騰訊（700）都幾硬淨，最近咁多負面消息都頂得住，好似已經見到個底。

另外，就到年尾，差唔多係時間諗定2022年嘅倉位策略，細節我未係諗得好透徹，但大方向一定繼續係半導體概念，想做懶人嘅，一定係大包圍買隻三星半導體ETF（3132）。

早幾日提過嘅時代電氣（3898）都好好彩，講完升咗兩日，成條上升軌非常明顯，就算新手應該都玩得掂。

仲有，前幾日有聽過我節目嘅朋友可能都會聽到我推介比亞迪電子（285），今日就再補充多少少。見到喺圖表上嚟講，50幾蚊延伸落嚟嘅下降軌道之中似乎終於都見到底，可以一棍突破上返26、27蚊，當時都有叫大家留意下。有成交配合之下，走勢都好凌厲，整固完之後終於都上返30幾蚊，相信都可以再望上多少少。

利益申報：
證監會持牌人，本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。