【戴耀豪專欄】揸住騰訊開心 揸住京東好愁 「大股東變相減持 前景唔睇好」

之前成日都話驚疫情反彈，令市場憂慮，大市都沉咗一陣，見到近排都多好消息沖喜下，例如疫苗增加抗體水平等等，加上唔知係咪放假想開心下，個市終於有得彈，上日（23日）終於剛好上返10天線樓上，報23193點，叫做升到91點，不過見到成交額得1091億元，資金流都係比較弱。

10天線：23190點
20天線：23182點(已跌穿)
50天線：23179點(已跌穿)

Photo from BusinessFocus

Photo from BusinessFocus

技術分析方面，睇到14天RSI突然爆升上60.15，雖然我之前係有講過，升上50就代表出現轉好訊號，但係今日得半日市，而且一浪低於一浪形勢未見扭轉，嚟緊又假期，相信大家入市動力都會弱啲，建議大家唔好心急，睇定少少，揸緊注碼，假期返嚟睇多兩日先好部署啦！

【#PerryTai推介】
焦點板塊：
騰訊、京東系

焦點股份：
騰訊（700）— 公布派京東股份作特別中期息，以京東（9618）前一日（22日）收市價每股279.2元計，涉資大約1276.86億元。

今次咁派法，一句講哂，有人歡喜有人愁，揸住騰訊嘅就開心，相信消息都會沖喜到股價，見到騰訊仲有綽綽有餘嘅能力派息，不過揸住京東就咪話唔愁，突然間多咗咁多碎股分薄股權，加上騰訊派哂出去即係變相減持，大股東冇咁壓場，信心的來源少咗，前景自然冇咁睇好，向下走機會較大。

其實我之前都講過，染藍嗰時我都唔睇好，而家加埋騰訊變相減持，中長線我就唔太睇好啦。

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。