download BusinessFocus app
【龔成專欄】青年月入4萬炒牛熊輸身家求救 翻身建議:先剪卡戒借貸 再月供儲股票  

【龔成專欄】青年月入4萬炒牛熊輸身家求救 翻身建議:先剪卡戒借貸 再月供儲股票  

Finance Investment
By 龔成 on 14 Aug 2021
專欄作家

【引言】有27歲小股民月入近4萬,原應生活富足,卻因沉迷炒牛熊貪勝不知輸,致賠掉積蓄兼欠下高息卡數,悔恨之餘不禁去信給投資書籍作者兼股評人龔成求救。龔成強調投資非賭博,但不少投資者如他年輕時都曾玩衍生工具望短炒致富,結果總是輸多贏少。故他呼籲來信小股民必須「重新開始」,先是要戒炒牛熊及看10本有關股神巴菲特的書,並剪掉所有信用卡勿再借錢,然後才可重新投資。龔成指關鍵是必須建立平衡及優質的投資組合,故建議由月供股票開始,以儲股模式投資及長期持股,避免再作炒賣。 

【理財個案--賭博投資輸身家求救!】

龔sir,講少少自己背景,我27歲,單身同屋企人住,搵40k。以前我要還grant loan,同埋大駛,月光族,直到19年我的起心肝儲錢,果年我大約儲左15萬,同年我初初接觸股票,主要買正股,藍籌,加少少潛力股,印象中升到18萬左右。

我個人比較急進,加上我身邊有朋友買牛熊,如是者,我又開始跟人玩,前排個市好chok,一開波,兩日內已賺到唔少,以為好易贏錢, 心雄,結果學人玩過夜,結果買錯邊。一開市輸剩得番幾萬,我唔止蝕,想快啲追番,結果去買左啲$0.01,幾接近回收價嘅牛熊,結果我輸晒所有錢。之後我休息左幾日,見個市跌左好多,應該會反彈,因為未到出糧,我忍唔住係信用卡透支左5萬現金出嚟再買,結果果日個市再插,我又輸晒,仲欠下銀行錢。過去2個月,我冇再借錢,因為自覺咁樣落去一定死緊,但為左快啲還晒啲卡數,我一出糧,就搵機會再買牛熊,雖然無輸晒,但係都輸左20-30%,結果拖慢左還款進度。

年青投資者多希望短炒賺大錢,結果卻是輸多贏少。Photo from 年青投資者多希望短炒賺大錢,結果卻是輸多贏少。

我好迷惘,覺得自己好失敗,身邊有朋友好保守,佢地都勉強買到500幾萬細細地嘅樓,而自己雖然事業好順利,有專業資格,嚟緊月薪仲會升到40k,但理財方面就差到極。我好想改變現況,唔想戶口永遠咁少錢,加上我自己都唔細,唔想再咁落去,請問我而家應該點做?

我打算先唔接觸任何投資先,盡快還清卡數,大約兩個月我會還晒,之後我打算cut咗個証劵行戶口,遲啲用番銀行買正股算,因為証劵行個app實在太方便,太多資訊睇到,又好多槓桿產品可以玩,自問自己自制能力比較差,一睇又好想玩。之後我想取消左個串流報價佢,一來慳返幾舊水,二來有串流,成日咁貼市,又會手痕,還原基本步,價值投資,根本唔使串流報價。最後,我想cut埋啲creditcard,留番一張方便自動轉帳算數。龔sir,你有咩建議畀到我?我還晒卡數後,之後每月大約儲到28k,應該點運用(來投資)好?

我希望老師可以救救我,謝謝!

炒牛熊證風險極高,不宜亂試免輸身家。Photo from 炒牛熊證風險極高,不宜亂試免輸身家。

個案重點:

‧27歲

‧賭博心態投資

‧利用信用卡投資

重點目標:

‧想改變投資模式

‧怎樣長遠累積財富

月供長線投資優質股,才有較大的成功機會。Photo from 月供長線投資優質股,才有較大的成功機會。

龔成老師:

唔少投資者,都會經歷短炒、玩衍生工具、賭博等心態,我20年前都試過,衍生工具、孖展等,我都有玩,當時當投資是賭博,想盡快賺錢,心急,心雄。我明白,呢個世界有些人能憑這些方法賺錢,但只是極少數,我過往做銀行同證券行,好明這點,而長期能賺錢的,大多是長線持有優質股的一群。其實,好多年輕人都有你這類心態,就算是上過我股票班的學生,我都知總會有同學忍唔住做短炒,但好多野要自己試過,先會死心,我講,你地唔會聽的。

你暫時停一停,唔好再投資先,呢段時間,你要睇10本有關巴菲特的書,明白點樣先最賺錢,之後先從新開始投資。同埋,剪去所有的信用卡,之後唔好再借錢投資。如果你抱有「我想好快賺翻所輸的」,就唔好投資。你要明白,投資是理財的其中一步,這是一個配置過程,你是將現金轉化為資產項,長線持有,到你好肯定自己明白這方法時,先再開始投資。

我地最重要是建立一個長期的「財富組合」,要優質,要平衡,要適合你的年齡與風險承受程度,建立後長期持有,不是買賣賺差價,而是成為你財富組合一部分。如果你真心想累積財富,就由月供股票開始,以「儲股」的模式進行,不要再炒賣。

----------------------------

8

龔成老師簡介

‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》、《80後千萬富翁》、《5年買樓4部曲》作者

‧ 《經濟一週》理財真人Show節目擔任致富教練

‧ 曾接受多個傳媒訪問

‧ 過往於銀行從事投資相關工作多年

‧ 曾在萬多元月薪狀態下,憑股票累積數百萬財富

‧ 於網上分享投資心得,瀏覽量過百萬,為人氣博客,解答網友理財問題逾20,000條

‧ 《經濟一週》、《華富財經》專欄作家

‧ 證券業持牌人士

‧ 股票課程導師,學生人數逾4,000人

‧ 過往10年投資成績,過半能獲利超過1倍以上

Facebook專頁「龔成」粉絲人數超過200,000人

若然你有問題想向龔成老師發問,可在龔成的fb專頁中(www.facebook.com/80shing)inbox龔成。

----------------------------

Text by BusinessFocus Editorial

免責聲明:本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關言論招致損失,概與本公司無涉。投資涉及風險,證券價格可升可跌。

🏆 立即報名「中小企卓越成就獎2024」

【了解更多最快最新的財經、商業及創科資訊】

👉🏻 追蹤 WhatsApp 頻道 BusinessFocus

👉🏻 下載 BusinessFocus APP

👉🏻 立即Follow Instagram businessfocus.io

最新 金融投資熱話專頁 MarketFocus