【龔成專欄】公司結業中產打工仔月薪大減逾半供樓供保險入不敷支如何打破困局？

By 龔成 on 27 Feb 2026

專欄作家

財經書籍作者及股評人 https://www.facebook.com/80shing -《80後百萬富翁》、《財務自由行》、《50優質潛力股》、《股票勝經》等，十多本財經書作者 -於網上分享投資心得，瀏覽量過百萬，為人氣博客，解答理財問題20000條 -讀中學時已開始投資股票，逾20年投資經驗 -運用巴菲特的價值投資法買股，視買股票如買生意一樣 -過往10年的投資成績，逾過半數能獲利超過1倍以上 -淨流動資產逾數千萬 -成功獲取基本財務自由

香港經濟不再興旺，有打工仔人到中年遇上公司結業，月薪由44000元大減逾5成至2萬元，苦不堪言。加上事主以往是月光族，還要供內地樓，更要每年供醫療保險及儲蓄保，嚴重入不敷支致欠債，遂感徬徨無助。投資書籍作者兼股評人龔成認為，事主當務之急是開源節流，包括做是兼職或小生意增加收入，另外應認真考慮賣樓及放棄儲蓄保，以求盡快收支平衡，這樣才能令自己及家庭經濟狀況改善。

【理財個案：打工仔減薪逾半供樓供保險入不敷支點算好？】

龔成老師：

龔sir 您好！我遇到經濟上的困難，所以想找你傾訴一下，睇吓有冇方法可以幫到我，遇上人生黑洞，唔敢同朋友/家人講出自己的困難，無論你回覆與否，都起碼提供了一個空間給我，謝謝！我現在人到中年，遇上公司結業，由月薪四萬四到最近只能揾到大約二萬（以前過度消費、少儲錢等）

但我的負債有以下：
珠海一個單位，月供七千（還有八年）
媽媽及自己的保險，每年大約十三萬（包括儲蓄、醫療、危疾等）
欠銀行P-loan 十八萬（年底要還）
欠家人十三萬

現有資產：
港元$50，000
人民币$50，000
股票大概$110，000
月薪$20，000

其實銀行有好多時叫我借錢，但好像沒完沒了，但年底的loan 我是否繼續借，還是賣出股票，盡量還清？我已經只是每月一、兩次跟朋友到內地消費，保持朋友圈，亦沒有其他消費了。

人生低點，經濟感到壓力，謝謝給我一個空間傾訴一下

讀者敬上

個案重點：
‧公司結業，收入減至$20000
‧中年
‧有一個珠海單位
‧現金約$10萬，股票$11萬
‧欠銀行$18萬、欠家人$13萬

重點目標：
‧是否再借錢，還是賣股票
‧消費已不高
‧人生低點，經濟感到壓力，怎樣改變

龔成老師分析：

其實人生總有高山低谷，但最終結果會係點，就好睇個人心態。首先，我明白你同時間遇到咁多問題，的確係幾令人氣餒。不過，你要知道你現時架問題，唔係不能解決，但要一步步去做。

我地做投資增值，一定只會用閒錢，所以而一刻如果你係有明顯架入不敷支，就應先處理好收支平衡問題，除了基本開支，你主要支出來自珠海物業、保險、同埋借貸。相信你較大的問題，就是收入減少，所以在支出已大幅減少下，你仍感到好大壓力，以及進入了一個困局。因此，你一定要想「怎樣開源」！

做兼職、小生意，還是其他方法，能否助你創造新收入來源。同時，你可以找更高人工的工作，有機會你過往的職位，能否在市場上找到工作，就算不是過的人工，只要能提高現時人工，都值得，這點無論短期，還是長期，都建議你去做。

以下我再講述你現時情況：

借貸︰
銀行借貸如果係息口高，建議你先清還。有需要就要賣股票，不要不斷借錢去還。家人部份，睇下可唔可以討論下，等工作再穏定D和人工高少少，才清還，去盡量減輕每月財務壓力。

物業︰
如果你係自住，咁你可以保留。但投資的話，我自己本身預期內地樓市唔會再好似以往咁大升，所以投資價值係弱左。再加上你現時要盡力減少開支，建議你考慮下這個物業，是否仲有長線持有的必要。

保險︰
保障型保險，我建議你保留。至於儲蓄型保險，其實增長力好一般。如果你只係供左好短期，建議你考慮唔再供。如果係較長期，你可以考慮提取(部份/全部)保單價值，去幫輕自己財務。

投資︰
其實中年，只要你用正確的投資方法，依然可以做到一個理想架回報，去為自己退休做準備。不過，你現先情況，應該先處理好本身財務，至少令自己收支平衡先。
投資部份，可能你短期內未必有空閒資金去進行。但唔好因為咁，就停左。你一定要開始學好投資，而唔係等到手頭上有錢先去學。因為要掌握好一個足以令自己長線成功的投資技能，係需要時間。同埋，要多做分析去累積經驗。所以學習方面，建議都盡早去做。