月入4萬打工仔後悔玩牛熊證輸光身家再欠卡數想翻身要靠4部曲?

By 龔成 on 23 Jun 2025

專欄作家

財經書籍作者及股評人 https://www.facebook.com/80shing -《80後百萬富翁》、《財務自由行》、《50優質潛力股》、《股票勝經》等，十多本財經書作者 -於網上分享投資心得，瀏覽量過百萬，為人氣博客，解答理財問題20000條 -讀中學時已開始投資股票，逾20年投資經驗 -運用巴菲特的價值投資法買股，視買股票如買生意一樣 -過往10年的投資成績，逾過半數能獲利超過1倍以上 -淨流動資產逾數千萬 -成功獲取基本財務自由

27歲打工仔原䉺是月入4萬的中產一族，但沉迷牛熊證想賺快錢，結果先輸光6位數積蓄，繼而拖欠卡數，他後悔不已，想翻身卻不知道應怎麼辦。投資書籍作者兼股評人龔成認為，想翻身首先要明白財不入急門，故應該按部就班實行理財投資4部曲：首先是全力儲蓄清還欠債、剪掉多餘的信用卡、然後是看10本股神巴菲特的書、最後當重新開始投資時，切記不要借錢買股，堅持長線買優質股。

【理財個案：賭失熊證輸身家！怎樣翻身？】

龔成老師：

龔sir，講少少自己背景，我27歲，單身同屋企人住，搵40k，以前要還grant，loan，同大使，月光族。直到幾年前我的起心肝儲錢，果年我大約儲左15萬，同年我初初接觸股票，主要買正股，藍籌，加少少潛力股，印象中資產曾升到18萬元左右。

我個人比較急進，加上我身邊有朋友買牛熊，如是者，我又開始跟人玩，前排個市好chok，一開波，兩日已賺到唔少，以為好易贏錢。我心雄，結果學人玩過夜，結果買錯邊，一開市得番幾萬，我唔鋸，想快d追番，結果去買左d，0.01，幾接近回收既牛熊，結果我輸晒所有錢，之後休息咗幾日，見個市跌咗好多，應該會反彈，因為未到出糧，我引唔住係信用卡透支左5萬現金出黎再買，結果果日個市再插，我又輸晒，仲差銀行錢。這兩個月，我無再借錢，因為自覺咁樣落去一定死緊，但為咗想快啲還晒卡數，我一出糧，就搵機會再買牛熊，雖然無輸晒，但都輸左20-30%，結果拖慢左還錢進度。

我好迷惘，覺得自己好失敗，身邊有朋友好保守，佢地都勉強買到500幾萬細細地既樓，而自己雖然事業好順利，有專業資格，未來人工會升到超過40k，但理財方面就差到極。我好想改變現況，唔想戶口永遠咁少錢，加上我自己都唔細，唔想再咁落去！請問我而家應該點做？點翻身？

我打算先唔接觸任何投資先，盡快還清卡數，大約兩個月我會還晒，之後我打算cut咗個證劵行戶口，遲d，用番銀行買正股算，因為證劵行個app，實在太方便，太多資訊睇到，又好多槓桿產品可以玩，自問自己自制能力比較差，一睇又好想玩。之後我想取消左個串流報價佢，一來慳返幾舊水，二來有串流，成日咁貼市，又會手痕，還原基本部，價值投資，根本唔使串流報價。最後，想cut一啲creditcard，留番一張方便自動轉帳就算。

龔sir，你有咩建議比到我？我還晒卡數後，之後每月大約儲到28k，應該點運用好？我希望老師可以救救我，謝謝！

讀者敬上

個案重點：

‧27歲

‧賭博心態投資

‧利用信用卡投資

重點目標：

‧想改變投資模式

‧怎樣長遠累積財富

龔成老師分析：

你27歲，仍是分年輕，只要你之後用正確的理財模式，仍可以累積到一定的財富，記住財不入急門，不要有「心急想盡快賺翻啲錢」的心態。理財要我地一步步，有計劃有紀律進行，在可承受風險情況下，合理將財富增值。

唔少投資者，都會經歷短炒、玩衍生工具、賭博等心態，我20年前都試過，衍生工具、孖展等，我都有玩，當時當投資是賭博，想盡快賺錢，心急，心雄。我明白，呢個世界有些人能憑這些方法賺錢，但只是極少數，我過往做銀行同證券行，好明這點，而長期能賺錢的，大多是長線持有優質股的一群。

其實，好多年輕人都有你這類心態，就算是上過我股票班的學生，我都知總會有同學忍唔住做短炒，但好多嘢要自己試過，先會死心，我講，你地唔會聽的。我叫人唔好短炒、玩衍生工具，係因為我20年前試過，明白咁樣無錢賺。其實好多散戶仍抱這樣心態，有人識醒，有人唔識醒。

你暫時停一停，唔好再投資先，呢段時間，你要睇10本有關巴菲特的書，明白點樣先最賺錢，之後先從新開始投資。同埋，剪去所有的信用卡，之後唔好再借錢投資。

如果你抱有「我想好快賺回所輸的」，就唔好投資。你要明白，投資是理財的其中一步，這是一個配置過程，你是將現金轉化為資產項，長線持有，到你好肯定自己明白這方法時，先再開始投資。我地最重要是建立一個長期的「財富組合」，要優質，要平衡，要適合你的年齡與風險承受程度，建立後長期持有，不是買賣賺差價，而是成為你財富組合一部分。