【陳刀仔專欄】Apple 未來潛力 Apple M2 Ultra 由每人人手一部電腦到Chat GPT？

繼2015年的Apple Watch之後，蘋果 (NASDAQ: AAPL) 已經好多年無發佈過最新重要產品，而今年發佈會上嘅Apple Vision Pro同M2 Ultra就可以稱得上為重量級消息。喺了解佢同其他預告新產品對蘋果股價及未來估值的影響之前，可以先了解吓AAPL現況。

蘋果公司係一間全球知名嘅科技公司。佢嘅股價喺六月最後一個交易日創下咗歷史新高，市值首次收於3萬億美元以上，年初至今已升49%，跑贏標普500指數15.9%嘅升幅。早前花旗分析師Atif Malik亦給予蘋果「買入」評級，目標價為240美元，即尚有逾兩成三升幅，為華爾街最高目標價。

喺六月頭嘅時候，蘋果舉辦咗一年一度嘅WWDC (Worldwide Developers Conference)，率先公佈來年最新產品及研究成果。其中最令人關注嘅就係MR眼鏡Apple Vision Pro同M2 Ultra晶片。Vision Pro大家就聽得多，留意得多，亦都知道佢雖然好在夠哂創新、突破，但定價高到近港幣三萬。問心，你會唔會買呢？

今日反而想同大家深入討論好多人忽略咗嘅M2 Ultra——佢採用咗第二代 5 納米工藝製造，擁有多達 24 個 CPU 內核、76 個 GPU 內核同 32 個內核嘅神經引擎，每秒可進行 31.6 萬億次運算。蘋果表示，呢種能力可能會喺訓練「大型 Transformer 模型」時派上用場。

M2 Ultra 可以支持高達 192GB 嘅統一內存，比 M1 Ultra 多 50％，令佢可以完成其他芯片無法完成嘅任務。例如，喺單一系統中，佢可以訓練龐大嘅ML 工作負載，如大型 Transformer 模型 (Chat GPT就係用呢個learning model train出嚟!)，呢類模型即使係最強大嘅離散 GPU 亦都無法處理，因為其內存不足。

Apple silicon統一內存架構意味住高端 Mac 其實唔再係普通家用電腦，而係運行大型 AI 模型同進行緊AI 研究嘅驚人機器。喺呢個價位上，亦好少見到有其他系統能夠提供 192GB GPU 訪問內存空間。而更大嘅內存空間意味住更大、能力更強嘅 AI 模型可以裝入內存入面，令到好多普通用戶有機會喺許多人有機會喺個人電腦上訓練 AI，做到機器學習，而用返大型 Transformer 模型，就係每人人手一個Chat GPT！

雖然暫時仲未有 M2 Ultra 同A100（甚至 H100）嘅性能評估，但至少喺目前嚟睇，蘋果已經公開進入生成式 AI 訓練硬件領域，亦唔再局限於一間普通手機公司，而係半導體公司。Apple喺發佈會上為世界各地投資者描繪出一個相當不錯嘅未來增長潛力及市場前景，應繼續密切留意。

陳刀仔

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。