【戴耀豪專欄】商湯重啟招股抽唔抽？ 被美國制裁仍可上市 「呢啲錢我就唔賺了」

見到大市叫做有d好消息支持下，例如莫德納確認打第三針疫苗，可以提高針對Omicron變體病毒的抗體水平，消息紓緩咗大家對疫情嘅憂慮，加上美國方面，見到拜登基建方案似乎好難通過，之前話呢個方案可以創造數以百萬就業機會，而家通過唔到，見到有大行都即刻調低美國明年頭3季經濟增長預測，亞洲呢邊嘅投資者好似鬆一口氣，覺得資金唔會流返美股住，亞洲股市整體向好，港股亦都終於有得升。

Photo from BusinessFocus

Photo from BusinessFocus

上日（21日）終於見到有反彈動力，一度衝到上23100點，收市雖然喺返22971點位置，但仍然升到226點。我就建議大家都係繼續睇返23100點水平，如果升穿返並且守得住的話，嚟緊都大機會繼續見到有反彈，始終恒指由月內高位24300點水平碌落嚟，其實都已經跌咗唔少。

不過，唔好一見到彈一次半次就咁開心住，整體嚟講技術上見到大市仍然偏弱，始終恒指都仲係被多條平均線（十天、廿天、五十天平均線）壓住，連最近嘅十天線都未企得穩，加上留意返成交量上日都係得1103億，都係偏少。

10天線：23564點（已跌穿）
20天線：23751點（已跌穿）
50天線：24722點（已跌穿）

14天RSI仍然都係得33.73，未見到明顯轉勢嘅訊號，所以建議大家都係盡量做好風險管理，唔好一見反彈就以為個市好轉即刻就衝入場。始終嚟緊都放假，之前講過會做Window dressing嘅基金經理相信都開始或者準備放假，難免會導致資金有欠積極。

【#PerryTai推介】
焦點板塊：
啤酒股

焦點股份：
青島啤酒（168） — 見到資金湧緊入去，北水衝緊埋嚟，近期圖表上都見到有打底形態，向上突破到頸線，嚟緊可以留意一下國內通脹反唔反映到物價上升帶動，加上阿爺可能又會大力推內需，刺激國內經濟。成個啤酒股版塊相信都會乘勢而起。

另外都想寫下隻商湯科技（020），嗰頭話延遲上市，呢頭又正式重啟招股。12月21日起招股，至12月23日（四）止，預計12月30日（四）掛牌上市。

從新一份招股書見到，見到今次重新招股嘅發行規模、集資金額同定價範圍維持不變。全球發售合共15億股B類股份（視乎超額配股權行使與否而定），其中90%為國際配售股份，其餘10%為香港公開發售股份。招股價範圍介乎3.85港元至3.99港元，籌資約59.9億元.......（#toolongdontread）總之入場費就冇變啦，一手入場費4030.21元。不過就見到「招股章程所載的基石投資者名單出現變動」，集團就話「公司已與9名基石投資者訂立基石投資協議，認購以總額約5.1億美元可購買之數目的發售股份，充分反映公司獲得行業資本支持。」

Anyway，即係應唔應該抽呢？被美國制裁仲上到市，應該有得炒啦！不過呢啲錢我就唔賺了 ?

利益申報：
本人沒有持有上述文章提及的股票

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。