【龔成專欄】大學生克服抑鬱駕的士 自食其力月儲2.4萬 父母感欣慰惟股市風浪急 應怎投資保血汗錢

行行出狀元，職業無分貴賤！25歲大學畢業生因患抑鬱症致難做傳統文職工作，父母原猶豫應否讓兒子吃抗抑鬱藥，但兒子喜歡駕車，竟突破病魔，自行考取的士牌並專心做的士司機，做到自食其力，亦毋須吃藥。他更成功月儲2.4萬元，交給父母代為投資。父母對兒子的毅力感到恩慰，卻不知道怎樣才能以穩健方式去投資，令兒子辛苦賺得的血汗錢安全地增值。投資書籍作者兼股評人龔成認為，較安全方法是購買一籃子的優質美股及港股，自製安全的投資組合，亦可避開因重注於個別股票所帶來的風險。

【Q48001：大學生兒子克服抑鬱症做的士司機，自食其力努力儲蓄，父母應如何助他投資？】

龔成老師：

老師老師，我係你之前上堂嘅學生。我而家有兩個問題問你，因為我啲仔女已經出嚟做嘢，我同佢哋講要買股票儲錢，唔可以亂使錢，咁就可以提早退休。

首先喺我大仔，佢而家係的士司機， 25歲，因為個人能力嘅問題，佢只可以做的士司機（有三大學位），我哋都好支持佢做呢份工，佢平時冇乜使費，亦冇乜朋友冇乜社交，無慾無求，所以一個月可以儲到$24,000我哋買股票，我哋都係高位嗰度幫佢買咗小米、比亞迪呢啲股票，但唔擔心，會長期持有。不過而家諗緊應該幫佢買啲乜嘢，diversify 下，想你俾啲意見。

跟住就係我個女，佢啱啱出嚟做嘢，做見習律師，唔係搵好多錢，佢每個月只可以攞$5000出嚟儲錢買股票，佢尋晚問我，究竟買恒生同埋滙豐裏面嘅股票基金，但要俾3%嘅管理費，佢又覺得好似唔係好抵，定係直接買ETF，或者小米呢啲咁嘅股票，因為佢仲好後生，得23歲，所以想買啲比較進取啲嘅股票，例如小米，但係由於每個月只係得5000大元，想你俾啲意見究竟幫佢買乜嘢好。

老師，我想補充吓，我個仔係有阿士保加症，之前有輕微嘅抑鬱症，醫生話準備食藥，但係自從佢偷偷地瞞住我哋去考的士牌之後，自己有滿足感，醫生話如果保持住咁，係唔使食藥嘅，所以我哋都好支持佢搵到自己嘅路，同埋我都好proud of him，以他為榮。

讀者敬上

龔成老師分析：

其實每個人的人生，都係唔同。唔係一定要做普世價值話好架工作，先至算係美好人生。而且，要提早財務自由，工作只係其中一環，更重要係做好理財(令自己每月有錢剩，去做增值)，同埋學識投資(去累積財富)。

以你兒子年紀，每月可以儲到而個水平架錢，算係好唔錯。而女兒現時人工少，但發展潛力大，同樣係向好方向走。更重要，佢地好早有投資理財概念。只要唔好追，認真去做，因為佢地後生，係可以做到好好架複利效果。

<<兒子和女兒>>
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你兒子和女兒現時23/25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。策略上，你可以考慮「平穏增長股」和「潛力股」。現在你每月先用5成儲蓄，即$2500/$12000做月供。其餘先儲起，用一邊月供一邊儲蓄的策略。

選股上，你可以留意一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以自己了解下，再決定是否從中選股。

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）。另外再加：美股如微軟（MSFT）、英偉達（NVDA）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穩增長股類。若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

<<女兒>>

但你女兒每月可儲資金少，建議先集中指數ETF(如2800,VOO)，去平衡風險。因為指數ETF係一籃子不同行業架組合，具分散風險能力。就算當中個別股票出問題，對成個ETF都唔會有嚴重影響。

例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。若你未有定平貴能力，可以用月供或者分注模式去儲貨，去平衡買貴貨風險。

最後，希望你兒子早日康復。

==================================

龔成老師簡介

‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者

‧ 理財真人Show 節目擔任致富教練

‧ 曾接受港澳多個傳媒訪問

‧ 過往於銀行從事投資相關工作多年

‧ 曾在萬多元月薪狀態下，憑股票累積數百萬財富

‧ 現為全職投資者，擁過千萬財富

‧ 於網上分享投資心得，瀏覽量過百萬，為人氣博客，解答網友理財問題逾20,000條

‧ 專欄作家

‧ 擁財務學學士學位

‧ 股票課程導師，香港及澳門學生人數逾4,000人

‧ 過往10年投資成績，過半能獲利超過1倍以上

Facebook 專頁「龔成」粉絲人數超過200,000人

（https://www.facebook.com/80shing）

==================================

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。