【小龍專欄】投資分析唔係估一句升跌 而是一套完整策略 確保避開致命損失 找出入市良機

市場上好多人睇分析，只會記住一句最搶耳嘅說話，例如「見底」、「小心調整」或者某一個指數點位，之後再用每日升跌去判斷分析啱定錯。

但真正投資，從來唔係一句預言，而係一套包括方向、時間、價格、倉位同風險管理嘅策略。

例如我早年曾經提出，港股有機會喺2024年完成一個重要周期底部。其後我在文章中寫過，恒指進入萬二至萬五點範圍，可以用分段方式部署。

有人認為，既然講見底，點解唔直接講一個最低點？由萬五點一路講到萬二點，係咪搬龍門？

但我一直想表達嘅係：市場底部通常係一個區域，而唔係一個神奇數字。而且依個分析係我喺2017年做嘅分析，你係冇睇錯我係喺2017年寫2024年港股會見底，詳細你可以睇我喺2017年出版嘅書。

分析認為市場進入底部周期，係方向判斷；在萬二至萬五點之間分段部署，係執行策略。兩者唔但冇矛盾，反而要配合使用。

因為冇人能夠長期準確買中最低點。如果認為市場已經進入具備價值嘅區域，成熟做法並唔係一次過押上全部資金，而係分段處理、保留現金，再根據市場結構逐步確認。

同樣道理，我在今年4月接受訪問時，已經提醒6、7、8月要小心。之後市場踏入6月，港股、美股同亞洲部分市場波動明顯增加。

但「6、7、8月要小心」，唔代表三個月每日都要下跌，更加唔代表中間唔可以反彈。我亦從來冇講過8月一定見底。

我所講嘅係一個風險時間窗口：當市場估值偏高、升勢集中、資金成本上升，再配合周期進入敏感時段，投資者就應該降低槓桿、控制倉位同保留現金，而唔係繼續盲目追價。

回顧過去，無論係2024年港股低位分段部署，定係今年提前提醒6至8月風險，重點從來都唔係證明自己能夠估中每一日升跌，而係希望在市場真正出現變化之前，先制定好應對方法。

當然，任何分析都有可能出錯，我亦唔會話自己每次都準確。但投資最重要嘅，從來唔係建立一個永遠不會錯嘅形象，而係建立一套即使睇錯，都唔會造成致命損失嘅方法。

所以，評價一個分析時，唔應該只抽出一句說話，再用某一日升跌去判斷。

更加值得留意嘅係：分析有冇提前指出風險？有冇提出實際策略？有冇講清楚倉位應該點管理？市場環境改變之後，又有冇持續檢討？

其實大家要明白如果你喺網上可以攞到發達嘅秘笈，我相信世界上係冇窮人。過去我好多次嘅預測，被17年牛市, 我提前咗一年喺我本書入邊寫咗出嚟，同埋我預視埋18年熊市, 仲有譬如2021年二月及三月或者六月七月將會見頂下跌其實好多人都知道。但係好多人就係唔信原因就係成個世界不停同佢講個股市仲有得升，或者就係講你唔科學，但係何謂科學？如果科學嘅方法，但係預測錯晒。咁呢個係咪一個好好嘅方法呢？

分析只係地圖，策略先係行路方法。真正決定投資結果嘅，唔係估中一句升跌，而係你有冇按照風險、價格同時間，做好整套部署。

小龍

江恩理論及時間周期專家，陸港台出了多本著作及受不同媒體轉載文章，多次提前預測大市轉勢時間。

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。