【龔成專欄】28歲打工仔想7年後置業55歲退休 每月16000元全投資美股 是最佳策略嗎？

28歲年輕打工仔，每月有16000元流動資金可以投資股票，其夢想是7年後置業，55歲退休！但想達成這兩大理想，應該要怎樣投資？每月重注購買美國科技股，又是否最佳策略？投資書籍作者兼股評人龔成認為，年輕打工仔最好平衡投資，除買美股外也應該考慮買港股。其中一個最簡單的投資方法，便是同時買美股的VOO ETF以及港股的盈富基金（2800），可以分散風險。

【理財個案：28歲每月可投資16000元，想7年後置業，55歲退休！】

龔成老師：

你好龔成先生，我現時28歲，希望5-7年後置業，55歲可以退休。現在可以每月有$11000進行投資，另外扣除支出可以再每月儲蓄大約$5000現金用黎儲彈藥，見到市場較大回調既時候作為掃貨資金。

我現在打算主力投資美股，亦都打算用呢$11000分別月供共8隻股票，分別係VOO, AAPL, MSFT, GOOGL, BRK.B, V（Visa) , COST同埋PG。

1)我想問一問我放落呢8隻股票每月$11000既比例應該分別要係幾多比較好？係咪最主要要係放落VOO? 有無邊一隻你認為係需要刪減，吾應該出現係我投資組合上？

2）當我見到市場有較大回調既時候，我應該將我每月$5000果筆資金，放落邊到？主要VOO還是其他？

3）當我往後日子認為置業時機到既時候，我需要沽出一部分股票拎返現金，到時我係應該沽出一部分VOO還是其他個股？因為我覺得應該係會影響複息增長既問題？

十分感謝你！

讀者敬上

個案重點：
‧28歲
‧每月$16000作儲蓄及投資
‧月供美股

重點目標：
‧5-7年後置業
‧股票分配的比例
‧置業時，賣出那些股票

龔成老師分析：

首先，建議你諗一諗，退休後生活會係點過，需要每月有多少資金去支持你架退休生活，咁我地先至可以具體咁做規劃。例如你希望退休後，每月有2萬蚊現金流，以股息率6%計，你需要本金400萬。因此，我地要以這400萬作為目標，透過一些有增長力的股票，去累積這筆資金。到你退休時，再將這些有增長力股票，換成為收息資產（如收息股、年金、債券等），去創造你需要的2萬蚊現金流。

1）以你年紀，這些美股都適合。除左PG有少少保守，不要佔太大比重。至於資金分配方面，建議以VOO為主力，其餘平衡配置就可以。另外，你現時組合太集中美股，個別地區唔建議高於組合7成。未來時間，可以考慮加少少港股。以下是一些適合你年紀架港股，你可以參考下︰

平穩增值股，指數基金由於是一個組合，因此在平衡風險方面較好，例如追蹤港股的盈富（2800）。另外再加其他個股：港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

如果想增長力高少少，可考慮潛力股，例如指數基金，在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

2）我建議你到時再睇佢地架平貴度，同埋質素再決定投入邊隻，定係買其他股票。如果你到時無想法，先集中投入指數ETF，例如VOO。

3）主要睇兩大因素，第一，質素，第二，平貴。你到時要全面分析持有股票，如果該股質素較一般，長遠增長力較一般，就會賣出。

同時，你可以睇到時平貴度決定，較貴的就會先賣出，無想法就平均咁沽出。但記住，係置業架同時，要保留一定優質股做增值。到你要置業前半年至1年，你就要開始慢慢沽貨套現，唔好到用先一次過沽，因為無人知當時個大市水平。因此，你要慢慢沽，去平衡價格波動的風險。

==================================

龔成老師簡介

‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者

‧ 理財真人Show 節目擔任致富教練

‧ 曾接受港澳多個傳媒訪問

‧ 過往於銀行從事投資相關工作多年

‧ 曾在萬多元月薪狀態下，憑股票累積數百萬財富

‧ 現為全職投資者，擁過千萬財富

‧ 於網上分享投資心得，瀏覽量過百萬，為人氣博客，解答網友理財問題逾20,000條

‧ 專欄作家

‧ 擁財務學學士學位

‧ 股票課程導師，香港及澳門學生人數逾4,000人

‧ 過往10年投資成績，過半能獲利超過1倍以上

Facebook 專頁「龔成」粉絲人數超過200,000人

（https://www.facebook.com/80shing）

==================================

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。