【龔成專欄】散戶借孖展炒燶Tesla認股證輸掉1年利潤明年想買樓點翻身？

By 龔成 on 02 Sep 2024

專欄作家

財經書籍作者及股評人 https://www.facebook.com/80shing -《80後百萬富翁》、《財務自由行》、《50優質潛力股》、《股票勝經》等，十多本財經書作者 -於網上分享投資心得，瀏覽量過百萬，為人氣博客，解答理財問題20000條 -讀中學時已開始投資股票，逾20年投資經驗 -運用巴菲特的價值投資法買股，視買股票如買生意一樣 -過往10年的投資成績，逾過半數能獲利超過1倍以上 -淨流動資產逾數千萬 -成功獲取基本財務自由

散戶經常想賺快錢及刀仔鋸大樹。有讀者早前借孖展買Tesla call，結果炒燶了，原本大半年累積下來的10萬元投資利潤一鋪全部輸光。幸他還有125萬儲蓄即流動資金，故想找辦法翻身即是收復失地，以便明年買樓。

不過投資書籍作者兼股評人龔成認為，普通散戶首先要戒掉的，便是借孖展炒股特別是炒衍生工具「賺快錢」的習慣，因財不入急門。投資者其實應該先找出優質股票後，然後盡量在不借貸的情況下買入愛股作長線投資，方為最穩陣的股票投資獲利策略。

【Q38160：炒燶Tesla認股權證點翻身？】

龔成老師：

龔成老師你好，好耐冇請教你。
焁上星期我經歷咗一個幾大嘅挫折, 我買咗58張Tesla call , 總共輸咗100,000。將今年贏嘅錢, 接近輸番晒, 依家好迷惘, 所以想請教下你。
一直以來,我都係用孖展, 買正股+option, 孖展大約4-6%息，之前個倉有Tesla ,nvidia,Apple , 西方石油, Tqqq 三倍, SMH。
而家暫時清晒, 得返比亞迪100股, Cost 262，之前科網股今年賺嘅都差唔多全部輸返晒俾佢。
小弟今年29, 每月收入大概50,000左右, 底薪40,000，有一個仔啱啱出世未夠一歲, 老婆冇做嘢。
租緊親戚嘅物業, 每月$8000, 有一架車每月使費大概$5000左右。而家有1,000,000做緊定期, 大約留咗250,000嘅流動資金
出年想買一層大概5,000,000以下嘅居屋。我想請教吓你, 而家應該點做, 應該投資啲乜嘢？月供股票? 希望你可以用你嘅經驗, 幫幫我🙏
請教下, 市況唔同, 希望問吓而家嘅投資建議。

讀者敬上

龔成老師分析：

首先，你要改變你投資的模式。
孖展，做槓桿雖然會倍大你回報，但同時都可以倍大你的損失。所以風險好高，唔建議再用。
另外，我地都唔應該用衍生工具，因為佢地風險好高。
如果你係想長線做好投資增值，你未來時間一定要以「正股」作為工具。想法上，唔好再用估走勢，賺差價的模式。而係學識用投資優質企業，長線儲優質資產架心態。透過優質企業長線自然成長，去達至財富增值的目的。
至於你現時策略，首先你目標未來一年會買樓，這部份資金不要用來投資，因為時間太短，會有好大不確定性。建議置業用資金，用現金或定期去持有。
以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
未來投資增值策略上，你可以投資「平穏增長股」和「潛力股」。
如果你唔係太識做估值，建議你先用月供，去平衡買貴貨風險。你每月5成儲蓄做月供，其餘先儲起，用一邊月供一邊儲蓄的策略。
選股上，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。