【龔成專欄】月薪萬八元hea工沒前途 卡數未清 女月光族欲轉工一博 欲速不達 宜先學好儲蓄投資免陷險境

有年輕女月光族數年前轉行做辦公室行政工作，雖然工作量不多兼有萬八元月薪，但卻只是一份沒前途的hea工。女事主欲「博一博」辭職轉工尋找滿足感，卻又擔心一旦失業，數萬元未還卡數不如是何是好。投資書籍作者兼股評人龔成認為，女事主確可為了更好的前途轉工，但不急於一時，建議她靠兼職或進修先積累欲投身行業的知識，並於找到新工作後才辭職。龔成又認為女事主當務之急，反而是要盡快建立好儲蓄的習慣及清還卡數，以展開投資之路，為未來的人生做好準備。

【理財個案：無前途的hea工，走唔走好？】

龔成老師：

龔sir你好，之前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

見到你都會有解答讀者的一些問題，就睇下我會唔會咁好彩，你會見到我message。

本人2X歲，以前係做會展, event類工作的，都唔知好彩定唔好彩，幾年前轉行做了department admin，之後就疫情，眼見好多同行都失業或者停薪留職無工開，我諗我都算好彩。

但呢個位係死位，無人工加無職升，除非跟大圍每年幾個％，如果唔係都唔會有調整。好多熟d的director 都同我講，有得走就好走，呢個係死位。同埋覺得呢份工真係唔適合我，做左幾年都係覺得好辛苦，好頹。

甚至1年前因工作而抑鬱，d人成日羨慕我份工咁hea唔洗做，但我真係覺得好辛苦，無成就感，無嘢係我負責的感覺好唔鍾意，如果我係有家庭或等退休，咁呢份係絕世好工。

其實我有試過搵工，但依家個market好似無咩地方請人，同埋最驚係，再遲d 過慣退休生活，會出唔返去。連我男朋友都話我似足佢退休ge阿媽。因為我日日真係唔洗用腦，唔洗點做嘢，返去坐，同埋連自己都覺得，真係蠢左，哥下先恐怖。你覺得我應該走唔走好？

另外，想問你睇埋我理財情況，以下係本人財務資料：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，最近先發現財政狀況實在可怕，但感到唔知點算好。

因為現時財政係負債緊，亦唔敢轉工，因為依家有醫療福利，交通津貼，食飯津貼，但真係好辛苦，好驚自己會抑鬱落去，但又唔敢辭職。

希望參考下龔sir你的意見。謝謝。

女讀者敬上

個案重點：
‧2X歲
‧人工$18000
‧工作無太大前途

重點目標：
‧是否轉工的安排
‧理財計劃

Photo from BusinessFocus

龔成老師分析：

簡單來說，你長遠一定要跳出去，但就不一定這刻轉工。

我相信你對前途，都有自己的想法，因為你會去想這個問題，你話「無嘢係我負責的感覺好唔鍾意」，相信你都明白現時的問題，同時都想去改變，只是過往由於疫情，再加上你現有債務上負擔，令你唔敢去改變現狀。

你都要明白自己的想法，你不是無進步的心，只是暫時的外圍因素影響，因此，你要肯定翻自己，同時開始為自己設定一些方向。

如果你的行業，現時外面仍面對較大的不利情況，加上你這刻的財務情況，跳出去的確有風險，但你唔係無野可以做，你可以想清楚，自己未來10年、20年的路。你不是這一刻立即全面去改變，但你可以為未來去準備和舖路，等待時機出現，你就可以更有效率和本錢地，作出行動！

第一，你要了解自己。你的強項在那裡，這刻的工作根本不適合你，轉只是時間問題，但你長遠想做甚麼，過往會展相關工作？又或其他行業？多去想想自己想怎樣。

第二，當清楚上一點後，就要想想長遠發展方向，如果有一個明確目標，你要學什麼野技能，才可以做到心目中的理想工作？你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

第三，如果你想轉的工作，你現時已經達到當中的要求，其實可以去見下工，試下水溫了解市場。如果有適合的工，我會鼓勵你轉工。

記住，我地係要睇長線，只係對長線發展有利，短期可能人工較低架工作機會，你都應該要考慮。

至於你財富增值方面，你要先處理好信用卡負債部分，因為佢利息好高，會拖垮你投資回報。同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

你現時其中一個不敢轉工的原因，是擔心現時你的負債，所以，你日後不能再有這些消費類負債，否則只會影響你的理財，甚至影響你跳出去的勇氣。

另外，「保險」只係理財中防守部份，買足夠保障就可以，增值可以留比優質資產（如優質股、物業等）去做。已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，先儲起一定的現金作備用，之後再投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油！
==============================================

龔成老師簡介

‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者

‧ 理財真人Show 節目擔任致富教練

‧ 曾接受港澳多個傳媒訪問

‧ 過往於銀行從事投資相關工作多年

‧ 曾在萬多元月薪狀態下，憑股票累積數百萬財富

‧ 現為全職投資者，擁過千萬財富

‧ 於網上分享投資心得，瀏覽量過百萬，為人氣博客，解答網友理財問題逾20,000條

‧ 專欄作家

‧ 擁財務學學士學位

‧ 股票課程導師，香港及澳門學生人數逾4,000人

‧ 過往10年投資成績，過半能獲利超過1倍以上

Facebook 專頁「龔成」粉絲人數超過200,000人

（https://www.facebook.com/80shing）

==================================

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。