【戴耀豪專欄】反壟斷監管陸續有來 今年續睇綠色能源股 「2022年都係睇住阿爺頭」

首先同大家講返聲新年快上先！睇返舊年（2021年）恒指最後一個交易日雖然都升到285點，收報23397點，但睇返全年要跌成3833點，始終肺炎未過、監管風波蔓延至多個板塊、中美關係久唔久又升溫，所以新一年，我呢個#牛軍最後一個大好友當然要祝福個市快啲升返上去啦。

Photo from BusinessFocus

Photo from BusinessFocus

留意到2021年年尾大市成交量都真係比較弱，試過全日成交額都唔過千萬。圖表方面，見到大市仍然壓喺廿天同五十天平均線之下，依然都係比較弱勢。另外，見到14天RSI都落返44.69，之前都有講過，要維持喺50以上，先至見到轉勢訊號。我就覺得今年年頭大市可能都係繼續弱，最起碼都真係要升穿返哂幾條主要平均線先。不過，中長線我依然睇好大市，始終我之前都有提過，依家港股估值低，大市仲有上升空間。

10天線：23120
20天線：23456（已穿）
50天線：24390（已穿）

提起上一年，不得不提一提科網股，睇返恒生科技指數全年跌成32.7%。上年見到科網股受到監管困擾，騰訊（700）由3月高位773.9元跌到落456.8元收爐，蒸發達四成；阿里從上年年底232.6元一路碌到落嚟今年12月低位109.2元，創埋上市以嚟最低，跌成五成三簡直慘不忍睹。不過見到上年最後一個交易日，一眾科網股齊齊發力彈住過年，騰訊升到3%，阿里巴巴（9988）仲勁升8%。

究竟科網股2022年何去何從呢？其實消息面方面就見到，國家市場監督管理總局局長張工表示：

「2022年，要統籌發展和安全、效率和公平、活力和秩序、國內和國際，堅持兩個毫不動搖，堅持監管規範和促進發展並重，深入實施公平競爭政策，加強反壟斷、反不正當競爭監管執法，更好發揮公平競爭監管在宏觀經濟治理中的作用。」

就咁聽，似乎反壟斷監管都係陸續有嚟，恐怕新一年科網股都係繼續弱，我就建議大家轉睇留意其他版塊，尤其係受惠國策嘅股票，總之一句講哂，「新一年想越買越有，都係要睇住阿爺頭。」

【#PerryTai推介】
焦點板塊：
清潔能源股、綠色能源股— 自從前年內地提出全國淨碳排放量要於2030年前要達到「碳達峰」、2060年前要達至「碳中和」之後，一眾清潔能源股，例如風力、太陽能股都升到嘭嘭聲，相信新一年國策都會繼續關照呢類股份，始終「碳中和」係要不斷推進，未來有大量空間可以都會繼續炒。

焦點股份：
東方電氣(01072) — 特別想講講呢隻1072，見到上月廣東省發改委批准同意執行《廣東省電網企業代理購電實施方案(試行)》，表明「抽水蓄能電站的費用和需求側響應等費用，相關費用由全體工商業用戶共同分攤。」

即係點呢？即係成本可以由用電方分擔，轉嫁成本，蓄能投資空間會大咗囉。

睇返1072主要就係做抽水蓄能和火電設備，舊年半年年報都有交代到，屬於集團嘅國內最高水頭長龍山抽水蓄能機組已經投入運作，實力優厚加上受惠國策，預計市場嚟緊對抽水蓄能和火電設備需求都會好強勁。圖表上見到，見到整體走勢都係持續向上，上升動力強勁。止蝕位可以睇住平台整固區底部10.04元，保守少少可以喺10.5元止蝕，但我自己都幾大信心可以升穿前頂14.8元，甚至上到15元！

目標價:14.8元
止蝕價:10.5元

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。