【龔成專欄】持有3大中概股俱跌逾3成散戶忐忑應否沽貨改做美元定存止蝕與否看前景惟高風險股比例須設限

By 龔成 on 06 Jan 2024

專欄作家

中、港股票跌跌不休，有讀者同時持有阿里、美團、京東3大中概股及醫藥股藥明生物，股價卻不幸地一同累瀉3至4成不等，遂猶豫應否忍痛止蝕套回部分現金，趁加息潮未完做美元定期存款安穩賺取5厘回報率。投資書籍作者兼股評人龔成認為，若經分析後仍認同手上股票有前景及實力，本來不應僅因股價下跌便輕言放棄。但龔成指讀者的問題是手上高風險的潛力股比例太高，致風險失衡，故應考慮沽掉部分中概股換成平穩增值股以及ETF，令投資風險降至合理及可承受的水平。

【Q34604：手持中概股暴跌，應否止蝕改做美元定期】

龔Sir：

Hi，龔Sir。又有事想請教你。我現時手持4隻港股，包括阿里巴巴，美團，京東，藥明。

阿里幾年前已入，半放棄狀態，但放又吾捨得。美團，京東，各持1000股。
3690（美團）$138入，9618（京東） $148入。2269（藥明）$45入，持有2000股

其實呢幾個月，主要係美团同京東跌得太勁，我自己都好灰, 我一向睇好佢地對務and發展, 但近日真系跌到個心都驚驚地, 加上早期既阿里巴巴又係咁

我自己無做其他投資，近日有聽朋友講，攞個港幣去兌美金做定期利率不錯，都有咁嘅想法，想請教吓你現時我應該繼續留守，定係點樣做會比較好呢？

多謝你耐心回答我既問題

讀者敬上

Photo from BusinessFocus

龔成老師分析：

首先，我想你清晰返2個概念，同時有其他一些要點你都要注意︰

1) 我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

過往幾年，因爲疫情、俄烏戰爭、加息等一連串不利因素，香港的股市都偏弱。現時雖然疫情已經過去，各地政府都有刺激經濟復蘇的措施，但經濟回暖仍然需要時間。

你手上的持股，依然有長線投資價值。

2) 任何持有的股票，都唔應該有「半放棄狀態」的想法。如果長線質素出左問題，就要減持。無問題，就持有同睇下有無入平貨機會。

絕對唔可以因為佢跌，就放埋一邊唔理，去浪費資金和時間成本。

另外，如果單一股票、單一行業佔你組合比例較多，都要調整翻。

3) 阿里巴巴（9988），美團（3690），京東（9618）屬於科技行業，同一行業不應該超過組合的3成，避免風險過於集中，長遠要適量減持，維持合適的比例。

就好似近年科技行業被政策左右，你就會成個組合出現明顯的跌幅，這是一件很危險的事。

4) 你手上4隻股票都係潛力股，潛力股對於息口較爲敏感，同時波動性大。雖然你年青，但都建議佔總體的組合5成以內好了，以減低風險。

現時你整體的組合風險頗高，長遠可以考慮加入其他類別的股票做平衡，例如：平穩增值股。

平穩增值股，例如指數基金，美股如（VOO）、港股如盈富（2800），另外再加：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、恆基（0012）、港交所（0388）、領展（0823）、長建（1038）等，你可以了解下，並從中選股。