【龔成專欄】補習老師月入3萬仍是月光族 欲借錢買公用股及阿里博一鋪 年屆40應小心 借錢買股初學者不宜

30多歲的補習老師育有一名歲半的孩子，但不甘心自己月入3萬仍是月光族，故想借錢買股「博一鋪」。補習老師除了想買公用股收息，也因欣賞馬雲，欲想冒險多買他創立的阿里巴巴（9988）的股票。不過投資書籍作者兼股評人龔成認為，「借錢買股」其實是逼不得已的最後一著，風險甚高，初學投資的人不宜作這樣做。故建議事主最好是先腳踏實地，先行審視每月支出找出自己為何會變成月光族，盡快改善消費習慣增儲蓄及投資，之後再想其他。

【Q32801：快到不惑之年 想借錢買公用股及阿里擺脫月光族】

龔成老師：

你好，上個月睇咗你本”財務自由行” 開始認識你，亦對理財方面有啟發。
我本身管理財務十分混亂，冇乜系統，每個月都係儲唔到錢。就此，想請教吓龔老師，希望你可以抽到少少時間解答我一啲財務問題。

少少背景：
本人30尾，已婚，有一歲半大小朋友，另有自住物業。本人每月收入25k-30k(私人英文補習老師），另外仲有開公司做貿易生意，但依幾年生意差, 公司已停運一排。主要來源都係教書，有一小部份嘅收入係搵我嘅舊生幫我教學生而收取佣金

最近開始想擺脫搵幾多洗幾多嘅生活，考慮透過銀行貸款投資股票，但對股票嘅認識十分皮毛，後悔之前冇擺啲時間去認識。

想請教：
1. 自問個人嘅消費唔太多，但係都儲唔到錢，究竟我應該要提高收入？定係減少支出？定係Both?
2. 借錢投資股票嘅風險算唔算好高？喺投資股票上係咪應該揀啲公用股比較穩陣啲？
3. 本身對馬雲十分欣賞，所以主觀地想買阿里巴巴做長線投資，阿里巴巴會唔會係你所書上面講嘅優質股？（$79嘅時候已經想買，但嗰陣時冇多餘嘅錢)
4. 你嘅書系列裏面，我下一本應該睇邊一本書比較適合呢？

未知你會唔會有時間答到我問題，不過都十分感謝你先。

讀者敬上

Photo from BusinessFocus

龔成老師分析：

1)「開源節流」是可以同時並行的儲錢方法，但由於提高收入不是短時間可以做的，因此，開始的時候可以先節流。

你說本身的「消費不高，但儲唔到錢」，可以透過記賬的形式了解自己的資金流向。

2）通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

現時大市只合理區，明顯未係有個最好時機，若現時用借貸去投資，風險係唔細。

而且你本身係新手，投資知識不多，借貸投資更加不應該嘗試。

當我地進行投資增值時，係會因應自已的財政狀況、風險承受能力、年齡、負擔、要求回報等，從而確認那一類股票較適合自已。

公用股較爲適合投資初學者，雖然增長力不强，但風險較低。

不過，如果係用你年紀去衡量，應該是買具增長力股票。所以，你係初期可以先考慮公用股，之後有一定知識，再慢慢加入其他具增長力股票，咁會較好。

3）阿里（9988）係業務層面，擁有優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終之前面對內地監管收緊，因此風險度增加左，不過，相信最差的時期已過，同時見到中國政策開始講話重視平台經濟，都信正慢慢好轉。

其實，就算之前政策影響佢賺錢能力，佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但存有不確定因素的股票，分注投資是較好的方法，算是平衡了風險與增長的考慮。這股可以長線投資的，現時合理區中下。

不過要提醒你一點，唔好因為欣賞某個人，就去投資一間公司。因為除左管理層，我地仲要考慮行業、財務狀況、企業本身優勢等，去綜合判斷。

4）書本上，我可以先睇我架新書《圖解股票小百科》以及《80後千萬富翁》和《股票勝經》，都適合初學者。

==============================================

龔成老師簡介

‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者

‧ 理財真人Show 節目擔任致富教練

‧ 曾接受港澳多個傳媒訪問

‧ 過往於銀行從事投資相關工作多年

‧ 曾在萬多元月薪狀態下，憑股票累積數百萬財富

‧ 現為全職投資者，擁過千萬財富

‧ 於網上分享投資心得，瀏覽量過百萬，為人氣博客，解答網友理財問題逾20,000條

‧ 專欄作家

‧ 擁財務學學士學位

‧ 股票課程導師，香港及澳門學生人數逾4,000人

‧ 過往10年投資成績，過半能獲利超過1倍以上

Facebook 專頁「龔成」粉絲人數超過200,000人

（https://www.facebook.com/80shing）

==================================

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。