【龔成專欄】誤信賭仔被騙100萬兩孩之母買股又輸心急如焚宜先買指數基金避開高風險股

By 龔成 on 17 Apr 2023

專欄作家

賭博害人不淺，有兩子之母因誤信沉迷賭博的好友，借出近乎全副身家100萬給對方救急，怎料對方賭性不改，累自己血汗錢泡湯。她其後曾欲藉投資熱炒股及濠賭股望翻身，以助丈夫置業，豈料股票又輸錢，遂感徬徨，急求穩健投資方法。投資書籍作者兼股評人龔成認為，財不入急門，絕不應寄望藉短炒獲利而解決財務問題，若要解決短期生活所需，應該是儲蓄現金而非投資。他補充，若有餘錢可作長線投資但又缺乏知識，可先行買盈富基金（2800）或美股VOO（追縱標指）這類指數基金，再加上一些平穩增值股。然後待自己靠讀書或上投資課取得足夠財經知識後，再自行選擇投資升跌幅度較大的潛力股，會較為穩妥。

Photo from BusinessFocus

【Q30824：誤信賭仔被騙100萬，投資投資又輸錢，兩孩之母如何翻身】

龔sir：

龔sir您好，唔知你有無時間同興趣聽我嘅故事，我係一個2個BB嘅媽媽，幾年前我誤信一個賭仔朋友改過自新，借左全副身家唔買樓去幫佢。當時大概借出100萬，點知佢死性不改，搞到我地同另一家人雞毛鴨血，而家我這個全職媽媽想話幫老公搵多個錢於是開始咗買股票，想畀個安樂窩仔女，點知投資蝕錢。

暫時蝕了38000元左右，我好想去上你嘅堂但無人湊仔，故想問你寶貴意見，同埋入門買邊本書好，因為我明白成功必須下苦功，做足功課。

而家我股票組合如下：
2282 美高梅 6200股平均7.56買入
2137 騰盛博藥 1000股平均23.38買入
3988 中國銀行 5000股平均3.12買入
9989 阿里巴巴 100股平均91.95買入

2237 中國石墨 40000股平均1.33買入
1177 中國生物 1000股平均4.43買入
3690 美團 200股 200股平均157買入
1128 永利 1600股平均8.94買入

我已經打定輸數，淨返個63萬收唔返，所以要重頭開始靠自己努力。我打算每月儲20000元買入股票，而家我得返幾萬蚊流動資金，但最近股票跌我唔敢再入，怕會跌得更低。

我相信有心唔怕遲，唔瞓我都想睇龔sir你所有嘅書，當然沒有上堂咁好，但呢個係我時下唯一可以努力嘅方式，我希望知道應該從邊本書入手。

讀者敬上

Photo from BusinessFocus

龔成老師分析：

先，你要明白我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。由於係長線計劃，你唔好預期佢對你短期財務上會有任何幫助。如果你要解決短期生活上所需，你係應該持有現金，而非進行投資。

至於長線財富增值方面，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。我相信你都偏年青，都係2X至3X年紀，故投資方向可以以增值為主。

你現時持有股票，都具有長線投資價值。但騰盛博藥（2137）、中國石墨（2237）、美團（3690）、阿里（9988）都是不確定較高的潛力股，以你新手而言，風險有點高。而美高梅（2282）和永利（1128）都有投資價值，但以澳門博彩業計，佢地質素又唔算最高。這些股票暫時唔建議你增持，如果想再穏陣D，你可以將部份換至「平穩增長股」。另外，如果你對定平貴無信心，我建議先用月供儲貨，去平衡買貴貨風險。

策略上，你可以用「平穏增長股」和「潛力股」作目標。你每月5成儲蓄，即$10000做月供。其餘先儲起，用一邊月供一邊儲蓄的策略。選股上，你可以投資在平穩增值股，例如指數基金，港股如盈富（2800）、美股如（VOO），另外再加：中銀（2388）、港鐵（0066）、恆基（0012）、港交所（0388）、希慎（0014）、領展（0823）、太古地產（1972）、長建（1038）、美股巴郡（BRK.B）（你可以了解下，並從中選股）。

潛力股︰安碩恒生科技(3067)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）、安碩納指一百（2834）。如果有投資美股，可投資QQQ。但佢地波動性和風險會較高，你要自己平衡。

Photo from BusinessFocus

但潛力股風險較高，對投資知識要求較嚴格，所以你可以先集中在平穏增長股上，甚至先集中供盈富(2800)和VOO這類指數ETF。到你投資知識有所提升後，才慢慢加入潛力股到組合之中。餘下的另一半現金，我地就等機會，當大市出現較大回調，就加大力度掃貨，然後作長線投資。

以上月供方法，雖然能幫助初學者在知識不多情況下，進行有限度的財富增值。但如果你想財富增值能力進一步提升，就必需加強投資知識，提升選股分析和估值能力。令你可以做到因應市況平貴，自行制定入市策略。

因此，我建議你要多讀投資相關書本、年報，新聞和報讀相關課程。書本上，你可以睇我寫的《80後千萬富翁》、《財務自由行》和《股票勝經》，都適合初學者。本人的【投資倍升股課程】也適合初學者的，每一課後都會有指引比你，要你在一星期內找那些資料，溫習那些內容，只要你跟著去完成，到你讀完整個課程後，你已能自己選股、投資、評估股票平貴，在投資上已掌握了一定的知識。在你能夠上堂之前，我偏向建議用月供儲住貨先，以免你操作上出錯，最終得不償失。