【戴耀豪專欄】恒指穿埋2萬3 市盈率已到10倍 全球數一數二低 「聖誕大家同個市都唞下先」

上次先同大家講到全球收水潮殺到嚟，美聯儲又加快縮減買債步伐，英倫銀行的出乎意料決定加息，見到港股方面都有反應，宣布議息結果當日，恒指創埋超過18個月嘅收市新低。之前疫情受惠最多嘅科技股更加好似出得嚟行，係時候還咁，再加埋反壟斷、中美關係惡化等等負面消息似乎又死灰復燃，科指見埋歷史新低。全個禮拜計跌成803點，落到23100點水平。

走勢方面，如果大市守得住23100點呢個位，都有機會見返個比較大嘅反彈，彈得起就再睇埋23500點位置，如果升穿收復嘅話，就代表呢一輪跌浪終於畫上句號。不過都要戴返頭盔，如果真係真係真係跌穿埋23100點水平，對下支持位就要睇返22500點位置，今日返嚟再睇下大市夠唔夠力啦。

Photo from BusinessFocus

Photo from BusinessFocus

其實圖表上都見到大市一浪低於一浪，指數繼續畀所有移動平均線(十天、廿天、五十平均線）壓住：

10天線：23725點(已跌穿)
20天線：23945點(已跌穿)
50天線：24798點(已跌穿)

加上14天RSI落到33.36，之前都講過上返50個市先叫發出轉好訊號，所以見到大市都係比較弱。而成交量方面，都係上日先叫回升到去1600億元，之前好一段時間都係1300億元樓下，都要再觀察下先知成交量係咪可以確定回升。

大市短期走勢都真係會比較弱，加上臨近聖誕，大家應該HOLIDAY MOOD仲大過炒市嘅意慾，所以都係繼續建議大家要儲下子彈，等個市有轉好嘅Signal先衝返入市，未有重倉喺手嘅投資者，不妨輕手少少，持形保態，慢慢加倉都未遲。

不過又咁，其實我之前都有提過，相信港股未來絕對絕對有空間上升，見到港股市盈率已經去到10倍，幾乎係全球股市數一數二低，所以其實上升空間嚟講，我都仲係#牛軍最後一個大好友，仍然對個市充滿信心，只係建議大家節日同年尾時候可能就同個市一齊休息下先。

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。