【戴耀豪專欄】基金年底前粉飾櫥窗 恒指若企穩可上望24800 航運股強勢 中遠海控逼近9月高位

總結返上個禮拜，恒指先跌後回升，原本周初見到一眾科技股都拖住大市，好似阿里巴巴(9988)、美團(3690)績後都唔太理想，後者由先前270元水平一路碌落240元暫時都爬唔返上去，恒指一度落返去23300點水平，不過之後美股方面科技股成為大市救星，好似阿里傳過可能重組業務，挽回大家少少信心，大市喺科技股反彈帶動之下，一度上得返24000點樓上。全個禮拜計，港股都升到229點。

咁今個禮拜就繼續睇返24000點呢個位置啦，如果今日開市守得住24000點，仍然有好多機會個市會繼續向上走，否則就可能要回調啦！同埋要留意返，會唔會有啲突發嘅黑天鵝消息，再度將個市推返落去。不過如無意外，我就覺得始終港股估值偏低，一般市盈率P/E 都去到8-9倍，我就相信大市會向上走，中長線我都會比較睇好港股嘅走勢。

Photo from BusinessFocus

圖表方面，上個禮拜恒指暫時都企得穩喺十天線樓上，繼續都係企得穩嘅話，RSI而家守住42左右，再升到50嘅話，再升到修復埋廿天線，甚至五十天線都不是夢。

10天線：23817點

20天線：24417點

50天線：24871點

同埋數下手指，都已經去到2021年年尾，要沽要跌嘅都應該已經沽哂跌哂，想走貨嘅應該都走得七七八八，市場沽壓暫時應該都會輕少少啦。同埋我就相信之前講過基金經理嘅Window Dressing（粉飾櫥窗）操作係未做哂嘅，都有機會再帶動大市繼續升多少少。

Photo from BusinessFocus

【#PerryTai推介】

焦點板塊：

航運股

焦點股份：

中遠海控(1919) ─ 上個禮拜有聽我節目嘅朋友都應該聽到我推介，上個禮拜集團董事會建議分別回購A股和H股10%，見到大股東都信心滿滿，預期業績會幾靚仔，之前成日傳運費到頂，但睇個勢嚟緊應該仲會有得升，第三季已經見到歐美航線運費創新高，中遠海控第三季盈利按年增長成16.5倍。相信第四季盈利都好大機會再創全年新高，甚至去到出年上半年，航運股都可以睇高一線。除此之外，大股東咁有信心，即係好大機會有得派息，對股民嚟講相當吸引，不過見到現水平都已經接近前頂(即九月份時16.1元)，冇貨就唔好追啦！因為都驚前頂有個比較大嘅阻力。

冇貨就唔好追，而家先見到點算？如果都想知道仲有邊啲類似推介，就要繼續留意我嘅文章同節目，最緊要係畀LIKE等我有更多動力寫多啲推介畀大家！

喜歡我嘅分析，請俾多D支持我，請幫忙CLS，Comment, Like & Share

利益申報：
本人沒有持有上述文章提及的股票

戴耀豪
結好證券客戶投資組副總裁

Text by BusinessFocus Editorial

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。