【龔成專欄】買派息基金欲賺4厘息散戶一年痛輸2成半本金買前應分析持股息低風險高不值博

By 龔成 on 19 Sep 2022

專欄作家

財經書籍作者及股評人 https://www.facebook.com/80shing -《80後百萬富翁》、《財務自由行》、《50優質潛力股》、《股票勝經》等，十多本財經書作者 -於網上分享投資心得，瀏覽量過百萬，為人氣博客，解答理財問題20000條 -讀中學時已開始投資股票，逾20年投資經驗 -運用巴菲特的價值投資法買股，視買股票如買生意一樣 -過往10年的投資成績，逾過半數能獲利超過1倍以上 -淨流動資產逾數千萬 -成功獲取基本財務自由

股市大起大落之下，有讀者一年前透過保險代理買入派息基金，以為可每月穩賺4厘息。豈料今年股債雙殺，派息基金一年內竟暴跌24%，縱計算了派息因素，帳面損失仍高達本金2成，遂感徬徨。投資書籍作者兼股評人龔成指出，不少派息基金股息率不足4厘，卻投資了不少高風險債券，風險偏高並不值博。他強烈建議作投資時應分散風險，買派息基金前須分析基金十大持股，了解派息是否保證收入等，免追悔莫及。龔成強調，投資「應先睇風險，而唔係先睇回報」。

Photo from BusinessFocus

【Q27824：透過保險代理買了派息基金卻一年慘蝕24%，怎麼辦？】

你好，我係一個唔識投資既人，通常都係身邊朋友/屋企人比建議我點樣運用資金。大約一年前，我喺永明用左大約26萬買左派息基金（首源亞洲鐵橋基金），agent 話每月大約派息$7xx （頭5年cash out有手續費）。

但經過一年，基金價格跌左24%。而家暫時淨番大約18萬價值, 應唔應該Cash out 止蝕？經紀建議轉一點非派息基金避一避, 等鐵橋升先再轉番。我應該聽佢講轉其他基金，定係而家cash out （手續費大約$15000）用餘下錢去買收息股隱隱陣陣？

【Q27818：定期派息產品信得過？】

有人介紹我一個定期派息的投資產品，我想問問它與派息基金的分別是什麼？

謝謝老師！

Photo from BusinessFocus

龔成老師分析︰

投資算得上是一個人生必需接觸的範疇，而且對你將來都幾重要，建議你花點時間去了解，去唔只係靠聽人講，而去做決定。首源亞洲鐵橋基金，過主要投資（即最少70%的本基金資產淨值）於均衡投資組合（包括亞洲（包括澳洲及紐西蘭，但不包括日本）債務及證券市場的政府、超國家機構、公司或其他發行人發行的股票或股票相關投資及定息債務證券此基金當中，不少資產投資在一些較高風險債券項目。而時全球進入加息週期，再加上經濟疲弱，故出現大跌幅是正常。

其實好多投資者，投資這類債券基金，都會覺得穏陣收下息，應該無問題。但其實現時派息率只係3.X%，唔算好吸引。而且，而隻基金派息政策係可以改變，唔係保證。更重要時，好多投資者只在意而一刻個派息，完全無留意到會有賺息蝕價的問題，這本都是應該留意的風險。

這類收息產品本身有一定風險，而且增長力唔高。如果你係年青至中年人士，應以財富增值為目標，這類產品不適合你。你可以考慮，換至其他較有增長力優質股。若你係中年至退休人士，目標只係想收息，這類產品不確定性都高，都未必咁適合。當然，你接受到個風險，你可以照持有。當佢進入下一個減息週期，有機會升翻，但要等幾耐無人知。而且，此期間基金內有債券出現違約，基金價格可以跌好多，你要明白有這個風險。

此外，要留意有時某些人推介的些投資項目，個效果好以派息基金。但究竟投資什麼項目？風險度有幾高？是否有穩定收入（是否保證收入）？信託公司是否可靠等等？這些問題都必須去了解。千萬不要只是單憑少少資料，就去判斷投資價值，要再了解清楚，才好考慮是否投資。

至於一般的股票派息基金，我們最少要知道它的10大持股，確定這些股票是有質素，才好考慮是否值得投資。另外，要了解主要持有資產的風險度，整個基金的風險度、投資策略，是否與你的投資目標配合。另外，你可睇佢過往的回報，是否跑贏大市，如果是，才有投資價值。你可以以此作參考，去評估一下你個投資項目，是否有投資價值。記住，投資係先睇風險，而唔係先睇回報。