【戴耀豪專欄】北水係咁先啦 愛股農夫山泉也暴跌 「北水所謂回歸 實質係沽貨」

港股2022年開咗局幾日，終於等到北水喺上日正式回歸，不過見到大市只係能夠微升15點，收報23289點。日子上就係所謂回歸，但實質上係沽貨，流出成15.7億元，急到好似同大家講句「係咁先啦」就走咗佬咁，非常可惜，北水返嚟並冇為港股帶來動力。

Photo from BusinessFocus

Photo from BusinessFocus

不過咁，我身為#牛軍最後一個大好友，中長線嚟講依然對個市充滿信心，其實而家見到恒指都可以企穩喺10天線樓上，如果嚟緊成交額可以上返1300億、1400億元，相信大市可以穩步向上。14天RSI方面，暫時保持喺42.92水平，我諗都要多少少時間靜待RSI上返50樓上，先至可以話個大市係正式轉好。

10天線：23193
20天線：23429（已穿）
50天線：24276（已穿）

版塊方面，其實上一篇先同大家講過，新一年科網股暫時都係會繼續弱，「新一年想越買越有，都係要睇住阿爺頭。」，阿爺都未同科網股示好，就算阿里巴巴（9988）呢啲龍頭中間彈一彈都唔好太開心住，你睇上日恒生科技指數都跌58點，收報5581點，反而呢排舊經濟股喺版塊輪動之下可以望下，例如滙控（005）上日都升到2%。

【#PerryTai推介】
焦點板塊：

抗通脹概念股—首選奢侈品名牌，1913、1910 一定得

呢類股份早排都有炒過通關概念，不過通關無期就慢慢跌返落去，但其實唔通關、冇旅客之下，一樣都有得炒，事實就係睇返Prada（1913）方面，上半年毛利率達74.3%，其實仲好過疫情之前，所以邊個話唔通關就冇生意？新秀麗（1910）減價喺唔減價嘅情況下，上季虧損收窄95%，而且高端品牌產品有時擺得越耐炒價越高，都係呢類奢侈品名牌無論喺股票上定實質上可以極力抗通脹嘅原因。

焦點股份：

農夫山泉（9633）— 九連升之後跌到咁，循例都要講講佢啦！好多人見佢跌到咁都會講句：「梗係啦！賣水邊賺到錢㗎？」，但睇股唔係剩係睇集團賣咩，要連埋成個市一齊睇，上面先提到，上日北水狂沽，農夫山泉素來有「北水愛股」之稱，單一隻愛股都可以一日跌9.8%，短期我就唔單止唔睇好農夫山泉，都提定大家，呢排北水股信心都真係爭啲，北水資金相信暫時都會比較謹慎少少，冇咁進取。

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。