download BusinessFocus app
【戴耀豪專欄】年尾基金經理傾向維穩 期結後見真章 「中美制裁問題隨時再升級」

【戴耀豪專欄】年尾基金經理傾向維穩 期結後見真章 「中美制裁問題隨時再升級」

Finance Investment Bloggers
By 戴耀豪 on 29 Dec 2021
專欄作家 - 結好證券客戶投資組副總裁

許家印︰「絕不允許公司任何一個人躺平」,但投資者想躺平都正常……

好似計時炸彈般存在嘅中國恒大(3333)終於有返啲正面消息,集團公布截至12月26日,全國項目復工率為91.7%,就咁睇數字都過9成,算係話畀大家聽集團運作如常,上日股價都即刻彈到9.46%,收報1.62元。

不過呢啲好消息值唔值得炒呢?唔排除短期可以彈一彈,畢竟都跌咗咁多,不過我就唔係好敢入手啦。

不過,另一邊廂,騰訊(700)嘅監管炸彈就拆極都未完。最新就有限時上網,政策嚟講就執行得好成功嘅,集團方面話相關政策出台後,睇返9月騰訊嘅內地未成年人遊戲時間由舊年同期6.4%下降至0.7%,按年跌成9成。遊戲流水下降至1.1%,按年跌近半成。

BusinessFocusPhoto from BusinessFocus

BusinessFocusPhoto from BusinessFocus

講返成個大市,上日叫微升到56點,收喺23280點。臨近年尾,進入期指轉倉高峰期,相信大市上落最多只有2000、3000點。圖表上會見到,恒指形態上仍然未完全話勢頭轉好,仍然被50天線壓住,暫時都係睇住10天線係咪可以頂住先。同埋都要留意返成交不足嘅問題,睇返上日全日市成交額唔夠1000億元,得997億,同月中高位1700億好遠。

不過見到14天RSI就上返72.98,我就建議睇埋期指結算後,因為年尾基金經理都會傾向維穩,動作會保守啲,所以可能30號之後或者下年先會大動作返啲。

10天線:23252點
20天線:23238點
50天線:23230點(已跌穿)

仲有,見到近日中美關係都比較緊張,美國總統拜登上個禮拜四簽署《防止強迫維吾爾人勞動法案》,法案正式生效。睇返近排,西方對華態度都比較強硬,繼多國相繼杯葛北京冬奧會之後,台灣議題都頻頻被搬出嚟講。大家可能嚟緊都要睇住外圍局勢,尤其有部分議題係直接牽涉貿易,好似新疆棉、立陶宛制裁,亦唔排除制裁問題會再升級,呢個緊張局勢唔排除會維持到下年。

【#PerryTai推介】

短線科指利淡因素較多,亦有唔少資金順勢造淡科指成份股,手痕嘅朋友可以留意恒科法興熊(62255),槓桿比率約9.4倍,收回價6,000點,如果AMTX繼續有勢下壓,可以跟注短炒。

利益申報:
本人沒有持有上述文章提及的股票

戴耀豪
結好證券客戶投資組副總裁

免責聲明:本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關言論招致損失,概與本公司無涉。投資涉及風險,證券價格可升可跌。

🏆 立即報名「中小企卓越成就獎2024」

【了解更多最快最新的財經、商業及創科資訊】

👉🏻 追蹤 WhatsApp 頻道 BusinessFocus

👉🏻 下載 BusinessFocus APP

👉🏻 立即Follow Instagram businessfocus.io

最新 金融投資熱話專頁 MarketFocus