【戴耀豪專欄】阿里收購紫光臨門撻Q 新經濟炒唔起 「資金走哂去綠色能源」

大市暫時嚟睇，基本都係向上，近期升勢都算唔錯，雖然睇返成交額都未算好配合到，近期平均成交都係得1200億左右，但係都叫保持到升勢，暫時都企得穩喺十天線樓上，短線嚟睇都好大機會可以繼續向上，保持到勢頭嘅話，修復埋廿天線，甚至五十天線都不是夢。

10天線：26460點
20天線：26008點
50天線：24254點

而阻力位方面，如果守得住23800點關口，就可以睇返24600點水平，如果可以突破24600點嘅話，代表成個下降趨勢終於終結，恒指新一輪升浪就可以正式起動啦！

成個12月，都係繼續睇住一班基金經理繼續做一啲Window dressing（粉飾櫥窗）嘅操作，都叫托返起個市，有正面嘅效果出到嚟。見到RSI再升到43.04，繼續有得上升，嚟緊都係睇下幾時穿返50關口，釋出市況進一步轉強嘅訊號。

Photo from BusinessFocus

Photo from BusinessFocus

不過，風險方面都要留意返，見到資金都唔係好落到去一眾新經濟股，加上重磅股阿里巴巴（9988）又有負面消息傳出。《彭博》引述消息話，阿里巴巴牽頭財團收購打算破產重組嘅紫光集團，計劃喺臨門一腳遇到阻滯，傳聞就話中國政府擔心喺美國掛牌的阿里巴巴，會受美國近期收緊美國上市公司審計監管影響，令敏感訊息被披露，可以睇到中國嘅監管同美國上市中概股嘅審查都仲影響緊啲龍頭科企，話哂科網股佔恒指唔少比例，所以都要小心啲啦！

一眾新經濟股炒唔起，變相資金上日（9日）走哂去綠色能源板塊，嚟緊相信中央都會繼續支持呢個板塊，會繼續出台唔同政策都會幫到綠色能源股炒上，特別想同大家講講隻個股中廣核新能源（1811），市場一直憧憬碳中和，就集中火力炒風電火電，我相信核電都係碳中和重要一環，特別係發電能力穩定性上面嚟睇，核電絕對好過風電火電。

中廣核新能源噚日亦見到大棍破橫行阻力，走勢相當好，短線留意8元、9元兩個阻力位。

利益申報：
本人沒有持有上述文章提及的股票

戴耀豪
結好證券客戶投資組副總裁

免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。