download BusinessFocus app
熊市撈底 撈到五勞七傷 散戶牢不可破信念「鬥長命一定返家鄉!」

熊市撈底 撈到五勞七傷 散戶牢不可破信念「鬥長命一定返家鄉!」

Finance Investment Bloggers
By 陸建廷 on 24 Nov 2021
炬烽資本創辦人兼董事總經理 - BF 專欄作家

「280蚊好平!」「260蚊無得輸!!」「200蚊一定有承接!!!」。過去一年反復聽到不少老散聲嘶力竭地高喊著,並勇於築起千人萬人「血肉長城」不斷掃入「大到不能倒」、「非常穩陣」嘅阿里巴巴(9988)。

我曾經寫文章勸告有緣人千祈唔好260蚊「撈底」阿里巴巴,好彩阿里巴巴而家仲有139.3蚊(19日收市價),而唔係好似恆大(3333)咁跌左9成。否則,「撈底勇士」們的心理壓力會更大。

平係可以更平!如果牛市的貪婪催生估值泡沫的話,熊市的恐慌則是價值摧毀。喺熊市,公司估值往往會跌到好多人意想不到的情況。更壞的情況係唔少「無得輸」嘅藍籌會跌到永不超生,如2007年嘅思捷環球(330)、2009年嘅滙豐(005)。

撈底勇士牢不可破的信念「坐幾年鬥長命一定會返家鄉!」Photo from BusinessFocus

因此,散戶在熊市下應該持有現金或者把資本配置在其他處於牛市或上升趨勢的資產(如美股以及虛擬貨幣等)。其實喺熊市,除左順勢沽空,真係無咩好做。硬係要證明自己主觀眼光勝過市場客觀資金流嘅「撈底勇士」, 最後就算唔粉身碎骨,都會影響精神健康。

「阿里巴巴唔怕買貴左,坐幾年鬥長命一定會返家鄉!」撈底勇士們牢不可破嘅信念。唉,其實就算阿里巴巴之後牛市返家鄉,勇士們賺到幾蚊逃出生天,賺個幾蚊回報同佢地係呢段時間輸50% 本金嘅心理壓力同埋喪失賺取更好回報的機會成本相比,英雄們係得不償失。而且你又點知道阿里巴巴唔會變下一隻恆大?滙豐?思捷環球呢?萬一真係咁,而你又有越跌越買,咁就真係會重傷。

「撈底係價值投資,我都係跟股神巴菲特!唔會有錯嘅!」撈底勇士們另一個牢不可破嘅信念。其實好多老散將「越跌越買」誤解咗成為低買高賣!無錯,你係可以喺股票跌定咗,有明顯承接後,再喺估值相對平嘅時候買入,但絕對唔係喺不斷下跌嘅過程中買入!而我本人則更相信買貴,賣得更貴。

喺股市遭遇重創的人通常都係盲目相信某啲信念或者傳統智慧,我們必須保持How can I know I am right的心態,要在風險資產市場獲取超額回報,我們必須謙虛。共勉!

陸建廷
炬烽資本創辦人兼董事總經理

免責聲明:本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關言論招致損失,概與本公司無涉。投資涉及風險,證券價格可升可跌。

🏆 立即報名「中小企卓越成就獎2024」

【了解更多最快最新的財經、商業及創科資訊】

👉🏻 追蹤 WhatsApp 頻道 BusinessFocus

👉🏻 下載 BusinessFocus APP

👉🏻 立即Follow Instagram businessfocus.io

最新 金融投資熱話專頁 MarketFocus